श्रीशिवपञ्चाक्षरस्तुतिः

                           रचयिता
                  पं.श्रीव्रजकिशोरत्रिपाठी
               (१)
नन्दीश्वरं नूतनचन्द्रचूडं
                  नागेन्द्रहारं नगजामनोज्ञम् ।
नारायणीसेवितपादपद्मं
             न-काररूपं प्रणमामि नित्यम् ॥
                    (२)
महेश्वरं मङ्गलमंजुलास्यं
                  मन्दारमालामकरन्दयुक्तम्।
मन्दाकिनीराजितदिव्यजुटं
            मः-काररूपं प्रणमामि नित्यम् ॥
                  (३)
शिवं सुकण्ठं शववासवासं
           शान्तस्वरूपं शशिकान्तिकान्तम्।
श्रीविष्णुवन्द्यं तपनादिनेत्रं
             शि-काररूपं प्रणमामि नित्यम्॥
                     (૪)
वामार्द्धवेशं विषकण्ठमीशं
                   वृषाधिरूढं विभुवामदेवम् ।
विश्वैकवन्द्यं प्रभुविश्वनाथं
             वा-काररूपं प्रणमामि नित्यम् ॥
                    (५)
यतीश्वरं यक्षगणादिसेव्यं
                यमान्तकं देवगणातिपूज्यम् ।
यशोतिविद्याधनपुत्रधीदं
              य-काररूपं प्रणमामि नित्यम् ॥

      इति व्यासकवि-ध्यानसम्राट्-   
            कविरश्मि-ज्ञानज्योतिः      
   पण्डितश्रीव्रजकिशोरत्रिपाठिविरचिता
      श्रीशिवपञ्चाक्षरस्तुतिः समाप्ता।
               -------०---------

Comments

Post a Comment

Popular posts from this blog

श्रीसूर्योपचारपूजा

Image
                    सूर्योपचारपूजा                    ************ (१. क) आवाहनम्  हे सूर्यनारायण लोकबन्धो                  हे रक्तरूप त्रिगुणभिव्यक्त !। रक्तप्रसूनैः सुरभिप्रपूर्णैः                  आवाहनं ते नितरां करोमि।। (ख) आसनम्  हे पद्मधारिन् जगतः सुरक्षिन्             प्रकाशकारिन् जनकामदायिन्!। दिव्यं विनन्द्यं सुरवृन्दकाम्यं                   सुखासनं घस्रपते ! गृहाण।। (ग) पादासनम्  प्रदीप्तकान्ते कमनीयमूर्त्ते !                    त्वत्पादशोभापरिवर्द्धनाय। विभिन्नकाष्ठै रचितं सुरम्यं                    पादासनं वस्त्रयुतं गृहाण।। (२) स्वागतम्  हे दिव्यमूर्त्ते जगदेकशक्ते     ...
Read more

पञ्चदेवताध्यानम्

                  श्रीपञ्चदेववन्दनम् ( १) विघ्नेश लम्बोदर वक्रतुण्ड                   शैलेन्द्रपुत्रीसुत हस्तिमुण्ड !। गणेश्वर ज्ञानगणाधिनाथ                निराश्रयं पाहि नमामि देव ! ।। (२) नारायण भक्तगणाधिवास                   वैकुण्ठवास प्रभुविश्वरूप ! । संसारसिन्धुक्षयकुम्भपुत्र                 निराश्रयं पाहि नमामि देव !।। (३) गौरीश सर्वेश्वर चन्द्रशीर्ष                     गङ्गेश शूलाहिधर महेश !। नगेशपुत्रीश्वर विश्वनाथ                निराश्रयं पाहि नमामि देव ! ।। (४) दिनेश दिव्यद्युतिशोभमान                   तमोनिहन्तर्ग्रहराजराज ! । विश्वस्य चक्षुः कुशलं ददान                निराश्रयं पाहि नमामि देव...
Read more

श्रीगणपतिषोडशोपचारपूजा

Image
                श्रीगणपतिषोडशोपचारपूजा                                प्रणेता                       व्रजकिशोरत्रिपाठी                       ************** (१. क) आवाहनम्  हेरम्ब लम्बोदर विघ्नराज                      हे पार्वतीपुत्र महेन्दुरेश!। आवाहनं ते कुसुमैः करोमि                पूजास्थलं देहि शुभं प्रविश्य।। (ख) आसनम् -: दिव्यासनं सुन्दरमूषचिह्नं                कुशैः पवित्रं कुसुमैः प्रपूर्णम्। आस्स्व प्रभो! संकलितं मयेदं           गणेश! विघ्नं मम खण्डय त्वम्।। (ग) पादासनम् -: पीठं महार्घं मृदुवस्तुयुक्तं             पुष्पैर्विकीर्णं विवुधातिकाम्यम् । स...
Read more