श्रीकनकदुर्गावन्दनम्

                         रचयिता
               पं.श्रीव्रजकिशोरत्रिपाठी
                *******************
                     (१)
महारम्ये स्थाने विविधबुधयुक्ते द्विजवृते
स्तवैर्मन्त्रैः पूते निवसति मुदा या सुरगृहे।
दयाविद्यासंचिद्-वितरणरता चारुवदना
महामाया माताऽवतु कनकदुर्गा त्रिनयना।।
                      (२)
शिरोभागे यस्या मणिमयकिरीटं विलसति
तनौ यस्यास्तेजस्तपनकररूपं कलयति।
मुखज्योतिर्यस्या-स्त्रिभुवनजनाशां जनयति
सदा तृप्ता रम्याऽवतु कनकदुर्गा स्मितमुखी।।
                       (३)
करे खड्गो यस्याः शरसहितचापोऽपरकरे
मुखे हासो दिव्यो दलितदनुपुत्रः पदतले ।
सदा भक्तत्राण-प्रमुदितमनाः पद्मनयना
महादेवी सर्वानिह कनकदुर्गा समवतु ॥
                         (૪)
पूजान्ते विविधैः सुघोषसहितै-र्वाद्यैर्महासुन्दरै
र्लोकानां भजनैः प्रदीपनिचयै-र्भूदेवमन्त्रस्वरैः ।
कर्पूराग्निसमर्च्चनं भवति वै यस्याः पदाब्जाच्चिरं
नित्यं तां परमेश्वरीं कनकभां दुर्गां भजे सर्वदाम् ॥
                           (५)
अर्काग्निन्दु विभाति नेत्रनिचये यस्याः शशी मस्तके
दिव्यास्त्रं च भुजे सुचापसहितं वक्त्रेऽतिक्रोधानलः ।
नानापातकतापपातनकरी या दैत्यसंमर्दनी
नित्यं भक्तविनोदिनीं कनकभां दुर्गां भजे सर्वदाम्।।

         इति व्यासकवि-ध्यानसम्राट्-   
             कविरश्मि-ज्ञानज्योतिः      
   पण्डितश्रीव्रजकिशोरत्रिपाठिविरचितं
   श्रीकनकदुर्गाध्यानपञ्चकं समाप्तम्।
                   -------०--------

Comments

Post a Comment

Popular posts from this blog

श्रीसूर्योपचारपूजा

Image
                    सूर्योपचारपूजा                    ************ (१. क) आवाहनम्  हे सूर्यनारायण लोकबन्धो                  हे रक्तरूप त्रिगुणभिव्यक्त !। रक्तप्रसूनैः सुरभिप्रपूर्णैः                  आवाहनं ते नितरां करोमि।। (ख) आसनम्  हे पद्मधारिन् जगतः सुरक्षिन्             प्रकाशकारिन् जनकामदायिन्!। दिव्यं विनन्द्यं सुरवृन्दकाम्यं                   सुखासनं घस्रपते ! गृहाण।। (ग) पादासनम्  प्रदीप्तकान्ते कमनीयमूर्त्ते !                    त्वत्पादशोभापरिवर्द्धनाय। विभिन्नकाष्ठै रचितं सुरम्यं                    पादासनं वस्त्रयुतं गृहाण।। (२) स्वागतम्  हे दिव्यमूर्त्ते जगदेकशक्ते     ...
Read more

पञ्चदेवताध्यानम्

                  श्रीपञ्चदेववन्दनम् ( १) विघ्नेश लम्बोदर वक्रतुण्ड                   शैलेन्द्रपुत्रीसुत हस्तिमुण्ड !। गणेश्वर ज्ञानगणाधिनाथ                निराश्रयं पाहि नमामि देव ! ।। (२) नारायण भक्तगणाधिवास                   वैकुण्ठवास प्रभुविश्वरूप ! । संसारसिन्धुक्षयकुम्भपुत्र                 निराश्रयं पाहि नमामि देव !।। (३) गौरीश सर्वेश्वर चन्द्रशीर्ष                     गङ्गेश शूलाहिधर महेश !। नगेशपुत्रीश्वर विश्वनाथ                निराश्रयं पाहि नमामि देव ! ।। (४) दिनेश दिव्यद्युतिशोभमान                   तमोनिहन्तर्ग्रहराजराज ! । विश्वस्य चक्षुः कुशलं ददान                निराश्रयं पाहि नमामि देव...
Read more

श्रीगणपतिषोडशोपचारपूजा

Image
                श्रीगणपतिषोडशोपचारपूजा                                प्रणेता                       व्रजकिशोरत्रिपाठी                       ************** (१. क) आवाहनम्  हेरम्ब लम्बोदर विघ्नराज                      हे पार्वतीपुत्र महेन्दुरेश!। आवाहनं ते कुसुमैः करोमि                पूजास्थलं देहि शुभं प्रविश्य।। (ख) आसनम् -: दिव्यासनं सुन्दरमूषचिह्नं                कुशैः पवित्रं कुसुमैः प्रपूर्णम्। आस्स्व प्रभो! संकलितं मयेदं           गणेश! विघ्नं मम खण्डय त्वम्।। (ग) पादासनम् -: पीठं महार्घं मृदुवस्तुयुक्तं             पुष्पैर्विकीर्णं विवुधातिकाम्यम् । स...
Read more