सूर्यशरणाष्टकम्
रचयिता
पं.श्रीव्रजकिशोरत्रिपाठी
+++++++++++++
(१)
प्रातः स्वयम्भोः कृतिमावहन्तं
विष्णुस्वरूपं दिवसे धरन्तम्।
सायं महेशस्य गुणेन यान्तं
तं विश्वचक्षुः शरणं प्रपद्ये।।
(२)
प्रभातकाले बहुताम्रवर्णं
मध्याह्नकाले धवलांशुयुक्तम्।
दिवाक्षये सुन्दररक्तकान्तिं
तं विश्वचक्षुः शरणं प्रपद्ये।।
(३)
चतुर्भुजं शोभिततप्तभासं
गदाब्जशंखाभयदानहस्तम्।
विश्वस्य नित्यं विपदं हरन्तं
तं विश्वचक्षुः शरणं प्रपद्ये।।
(४)
रक्ताम्बरं रक्तसरोजहस्तं
स्वर्णादिहारैः परिशोभमानम्।
स्वचक्रमध्ये सततं भ्रमन्तं
तं विश्वचक्षुः शरणं प्रपद्ये।।
(५)
अहस्करं घोरतमिस्रनिघ्नं
सप्ताश्ववाहं द्युमणिं ग्रहेशम्।
सुवर्णयानेन सदा चरन्तं
तं विश्वचक्षुः शरणं प्रपद्ये।।
(६)
त्रैलोक्यसृष्टिस्थितिनाशदक्षं
स्वतेजसा तापितदैत्यवर्गम्।
संज्ञापतिं तामरसाधिनाथं
तं विश्वचक्षुः शरणं प्रपद्ये।।
(७)
श्रीवासरेशं त्रिपुराभिवन्द्यं
देवादिभिः सेवितपादपद्मम्।
लोके स्फुरन्तं गगने चलन्तं
तं विश्वचक्षुः शरणं प्रपद्ये।।
(८)
रक्ताभपुष्पैर्नितरां लसन्तं
दारिद्र्यरोगौ प्रविनाशयन्तम्।
आनन्दभावं प्रतिपादयन्तं
तं विश्वचक्षुः शरणं प्रपद्ये।।
इति व्यासकवि-ध्यानसम्राट्-
कविरश्मि-ज्ञानज्योतिः
पण्डितश्रीव्रजकिशोरत्रिपाठिविरचितं
श्रीसूर्यशरणाष्टकं समाप्तम्।
-------०---------
Comments
Post a Comment